Məktəblilərarası Maliyyə Savadlılığı Viktorinasının final mərhələsi başa çatdı

13–15 yaşlı məktəblilər arasında təşkil olunan Maliyyə Savadlılığı Viktorinasının final mərhələsi uğurla yekunlaşıb. Layihə Azərbaycan Respublikasının Mərkəzi Bankı, Azərbaycan Respublikasının Elm və Təhsil Nazirliyi, Azərbaycan Banklar Assosiasiyası (ABA), həmçinin Azərbaycan Bank və Maliyyə Tədris Mərkəzinin (ABFTC) təşkilati dəstəyi və ölkənin aparıcı banklarının tərəfdaşlığı ilə həyata keçirilib.

Final mərhələsində 20 məktəbli iştirak edib. İlk üç yeri tutan şagirdlər böyük mükafat və qalib sertifikatı ilə təltif olunublar:

I yer –   Novruzov Zeynəlabidin Elşad oğlu (S.C.Pişəvəri adına Respublika Humanitar Fənlər Gimnaziyası)
II yer –  Əhmədzadə Səmra Dəyanət qızı (Səttar Bəhlulzadə adına Xarici Dillər Təmayüllü Gimnaziya)
III yer – Əliyev Fariz Ariz oğlu (Səttar Bəhlulzadə adına Xarici Dillər Təmayüllü Gimnaziya)

 

Digər 17 şagird isə müxtəlif hədiyyələr və iştirakçı sertifikatı ilə mükafatlandırılıb.

Qeyd edək ki, viktorina “Bank VTB Azərbaycan” ASC, “Ziraat Bank Azərbaycan” ASC, Azərbaycan Banklar Assosiasiyası və ABA-ya üzv digər bankların maliyyə dəstəyi ilə təşkil olunmuşdur.

Gələcəkdə də bu kimi layihələrin davam etdirilməsi nəzərdə tutulur. Məqsəd məktəblilər arasında maliyyə savadlılığının davamlı şəkildə artırılması, onların şəxsi maliyyə idarəetməsi, büdcə planlaması, təhlükəsiz bankçılıq və rəqəmsal ödəniş bacarıqlarının möhkəmləndirilməsidir. Bu cür təşəbbüslər gənclərin gələcək maliyyə davranışlarına müsbət təsir göstərməklə onların maliyyə savadlı və məsuliyyətli vətəndaş kimi formalaşmasına töhfə verir.

 

Tədbirin təşkilatçılarından olan Azərbaycan Bank və Maliyyə Tədris Mərkəzi (ABFTC) 2000-ci ildə Avropa İttifaqının təşəbbüsü ilə yaradılıb və Azərbaycan Banklar Assosiasiyasının törəmə qurumudur. Bu günədək mərkəz tərəfindən 250-yə yaxın təlim mövzusu üzrə 38 mindən çox dinləyiciyə 2600-dən artıq təlim keçirilib.

 

Azərbaycan Respublikasının Mərkəzi Bankının Virtual Təhsil Platforması (VTP) — iqtisadiyyat və bank-maliyyə sahəsində bilik və bacarıqların əldə edilməsini dəstəkləyən ödənişsiz platformadır.
VTP-nin əsas məqsədi müvafiq təhsil istiqamətlərində bilik və bacarıqların formalaşdırılması üçün ənənəvi təlim üsullarını müasir formatda təqdim etməkdir. Virtual Təhsil Platformasının interaktiv multimedia resurslarından istifadə etməklə, istənilən yerdə və istənilən zaman peşəkarlıq səviyyəsini təkmilləşdirmək mümkündür.

İstifadəçilər platformada istənilən vaxt qeydiyyatdan keçərək seçdikləri kurs üzrə video-mühazirələrə, testlərə və digər tədris materiallarına çıxış əldə edə bilərlər. Tədris prosesi mərhələli mənimsəmə və özünütəhsil prinsiplərinə əsaslanır. Kursları müvəffəqiyyətlə başa vurmuş və yekun qiymətləndirmədə uğurlu nəticə əldə etmiş istifadəçilərə Mərkəzi Bank tərəfindən müvafiq sertifikat təqdim olunur.